Shoqëritë me Përgjegjësi të Kufizuar

Në këtë artikull do të flasim për Sh.p.k. si një nga format e organizimit të shoqërive për të cilën mund të themi lehtësisht që është një nga format më të përhapura.

Kjo vjen si pasojë e disa faktorëve si psh. struktura më e thjeshtë në krahasim me format e tjera të shoqërive tregtare dhe kapitali i ulët i regjistruar, respektivisht 100 Lekë. Një ose më shumë individë ose shoqëri tregtare vendas apo të huaj (ose nje miksim individësh dhe shoqëri ekzistuese tregtare), mund të vendosin të themelojnë një Sh.p.k., dhe nga momenti i themelimit do të konsiderohen si Ortakë të Sh.p.k.-së së krijuar.  

Secili prej ortakëve kontribuon në kapitalin e regjistruar të shoqërisë qoftë përmes parave apo edhe me pasuri të paluajtshme apo të luajtshme (kontribut në natyrë), duke shprehur vlerën e këtyre të fundit në para. Ky kontribut është i rëndësishëm të trajtohet me kujdes prej dikujt që dëshiron të jetë ortak në një sh.p.k. pasi kontributi i bërë në kapitalin e regjistruar të shoqërisë përbën edhe limitin maksimal të përgjegjësisë që mban ortaku kundrejt të tretëve. Gjithashtu, në varësi të kontributit në kapital, përcaktohet edhe përqindja e tij përfaqësuese në shoqëri e cila llogaritet në përpjestim me kontributin e bërë.

Edhe pse nuk ka asnjë përcaktim përsa i përket shumës maksimale në lidhje me kapitalin e regjistruar, kapitali minimal i kërkuar ligjor është vetëm 100 Lekë për të themeluar një Shpk. Ky kapital kaq i ulët është një prej incentivave të përdorura që sa më shumë persona të kenë akses në treg duke u themeluar si shoqëri tregtare.

Normalisht që për procesin e regjistrimit të një sh.p.k.-je nevojitet hartimi e Statutit dhe Aktit të Themelimit, të cilat mund të hartohen si dy dokumenta të ndarë apo si një i vetëm. Në Statut parashikohet mënyra e rregullimit të strukturës së shoqërisë, përcaktimi i detyrave dhe të drejtave të ortakëve, administratorit, procedura që duhen ndjekur në X raste, etj., pra Statuti në varësi të preferencës suaj mund të jetë super i thjeshtë (pra parashikimet bazike që gjendjen edhe në ligj), ose i krijuar posaçërisht për nevojat tuaja.

Administrimi dhe përfaqësimi i shoqërisë tek palët e treta (private dhe publike) bëhet nga administratori. Në varësi të vullnetit të ortakëve, kompetencat e administratorit mund të jenë të plota ose të kufizuara, kufizim i cili nëse bëhet përmes Vendimit të Ortakëve dhe më pas depozitohet në QKB në mënyrë që të reflektohet në Ekstraktin e Shoqërisë (ky publikim shërben për të vënë në dijeni palët e treta). Megjithatë, konsideruar që kompetencat e administratorit janë të shumta, do t’i shtjellojmë më në detaj në një artikull të veçantë dedikuar rolit të administratorit.